Cerpen Bahasa Bali

Makeber Ring Muncuk Carang Alit

Mahenyak akijap, manyingakin kabut kabut sane tebel makeber ring duur gadinge matan ai. Ngiring medalnyane ring paraduan. Semilir angine, dingin tuah , nutupin panyingakan lan ngerasain ia ngebelai jidat, bok, lan atma ipune.  nagih ngaba ia majalaran, joh ring langite. Nyingakin gumi sane kainjek.

“enggalang mulih Atrayu, Suudang metik bunga mitir”, meme nyeritang ring pinggir jalane. Atrayu kehenyak ring lamunanne, lantas meresang bungan mitir sane sampun kapetik ituni,lantas malaib, ring tengah padang gadang tegeh. Niki kahidupanne, Atrayu, ia lan kulawargane tinggal ring Bali, tepatnyane ring bedugul sane kaletak ring bukit. Dini suhune dingin, bek entik-entikan gede tegeh, penduduknyane bek sane berkebun lan madagang.

Akudang menit ring ladange, anak muani nguda bagus nemuin ia, “gek, margi ka  peken lewatin dija nggih?”, 

“lurus, saking pertigaan belok kanan, beli ikutin jalanne nika, pekenne bakal kaliatin ring pinggir margine”  jawabne makenyum ramah , “dados tiang nawang adan adine?”, “tiang Atrayu”.

“oh, tiang Aryana. Semoga iraga matemu, pamit Atrayu”. Lantas ia mamargi ka timpal-timpalne sane di mobil. Atrayu ngelambaiang tangan ngiring kamargiang Aryana.

“Atrayu, wenten tamu saking panginapan, atehang daaran nika ke kamar ia, nggih. Meme ada gae”, Atrayu sane idepnyane malayang-layang sadar.

“Hyang Widhi, apa sane kapikiran titian” raosne ring hati. 

Tok tok tok “tiang ngabang daaran sane kapesen”

Ada jatma muka pintu lan Atrayu kasiap. Ia Aryana”swastiastu Atrayu, adi sane ngelahang panginapan puniki?”, “demen matemu teken beli, beli lakar liburan?”, lantas pararaosang nika dados lantang. Ring teras panginapan sane dingin punika, kanikmatin cahaya bulan sane terang. Nganyutin dadua nika ka suasana sane tusing nyidang kaartiang.

“nah? Lung pisan?” raos Atrayu, ia ajak dadua majalan sepanjang jalan cenik sane sepi nika. Pagi sane cerah, kanikmatin mentari sane matangi ring duur gununge adalah hal sane kapinginin olih wisatawan. “Luung, yening kabarengin anak luh cara adi Atrayu”, wajah Atryu dadi barak. “beli, tusing ajak timpal-timpal beline?”, “tusing, rencana tiange lenan teken ia, tiang nagih ngajelajah, tusing ngalih hiburan”.

“suud uli dini?”, “ajak tiang ka tongos sane adi demenang”.

Lantas ia mamargi ka Danu Bratan, ngejuk ebe bareng-bareng, mincing lantas ka hutan nyingakin kebun anggrek, lan Aryana ngabaang Atrayu.

“apa niki?”, “buka enjepang, yen adi ngerasa perlu antuk kebuka”, “lan jani?”, “tusing dadi”, “hahahah, awas beli jailin titian”. Ia kedek bareng. Kaangetan ati iki mulai muncul.seiring dengan waktu, bunga nika dadi tambah mekar, kanti ngantosang kupu-kupu sane ngedatengin. Lung pisan.

“beli Aryana?”, jerit Atrayu uli kajauhan. Aryana maplalyan sareng timpal-timpalne ring panginapan. Tangannyane ngameluk anak luh, anak luh punika kasenyum sareng Atrayu. Atrayu ngerasa sakit, ia males makenyum nanging tusing seceria biasane. Lantas ia ngamargi sambil malaib lan ngeling. Kasakitin ring ati.

“Atrayu, ada sane lakar matemu” jerit memene ring sisi kamar. “tiang gelem, me”. Atrayu nawang sira nika, pasti Aryana. Ia sedih lan lara, inget teken dibi sanja, ia ngeling.

Sore punika, Atrayu matangi, ia ngingetin mimpi sane kaalamin petengnyane. Aryana mamargi mulih ka kotane. Lantas Atrayu enggal-enggal malaib ka bukit tongos ia ajak dadua nyingakin matan ai. Ngarep nyidang nyingakin Aryana ring sisi bukite.

Betisne kena lumpr lan luka. Teked ring duur bukite ia nyingakin mobil Aryana lan timpalnyane. Lantas ia material”Aryana, Amuraning titian”. Aryana ningehing ia apa tusing, ia ngarep matemu teken Aryana. Tresna sane tusing taen kaucap.

Ia inget teken hadiah Aryanane punika, ia mulih lan muka kotakne, ia nyingakin foto ia lan Aryana ring sisi ladange ngorta, sane kapertama ia matemu tekan Aryana, ada ulisan ring duri fotone”nika, foto sane kaambil adik tiange, ia demen pisan tiang kenal teken adi Atrayu”. Lantas Atrayu ngeling lan nyeselin gelagatnyane.

Yening galah sane mangkin nyerahang antuk ngutarayang tersena sane asih. Punika tresna punika makeber bebas. Cara kedis sane makeber ring carang alit, hampir kadapetin. Manyesel, kisah patresna sane sedih. Nanging, Hyang Widhi member iraga paplajahan tiap crita idup manusane.

 Jodoh Tusing Lakar Melaib

            Rahina mangkin ring SMPN 2 denpasar wenten pengumuman kelulusan. I Putu bangun kepupungan karna ibi petengne ia mebalih bola kanti sawetara jam 2. “enggalin manjus tu, suba tengai ne, tingalin pengumuman kesekolah.” Raos memene I Putu. “nah me, jani be tiang kal mejalan masuk.” Disampunne I Putu neked di sekolah, suba rame timpal-timpalne mejujuk ningalin pengumuman di mukak ruang guru. “minggir minggir, tiang jagi nolih pengumuman ne” keto raosne I Putu karna bes keliwat penasaran. “yeeeesssssssssssssss tiang lulus, suksma hyang widhi” raosne I Putu.

            Disampune neked jumah I Putu takonina teken memene “engken, lulus tu ?”. “jeg lulus me.” Pesaut I Putu girang. “ nah luung men keto, jani dija tu kal masuk?” petakon I meme. “keneh tiang di SMK  masuk me, apang nyidang ben pidan langsung megae” pesaut I Putu. “yen dadi meme ngorahang, SMA alih tu, pang aluh bendan ngalih kuliah.”. “oh men keto di Resman gen tiang masuk me.” Pesaut Iputu.

            Kacritayang jani I Putu sampun atiban masekolah di resman. Rikala pembagian kelas jurusan, I putu masuk kelas ipa yadiastun benehne ia milih kelas bahasa. “mih aget sing masuk IPS  kangguang be kelas IPA 8, yang penting IPA” raosne Iputu. Disubane masuk kelas pertama Iputu sing nyangka lakar matemu buin ajak Ni Kadek, tunanganne I pidan dugas SMP. “dek, adi buin ketemu? hahaha” petakon Iputu sambilanga kedek. “yeh saje tu, haha” pesaut Ni kadek. “yen mule be jodoh, jeg sing kal melaib dek, hahaha,” raos iputu sambilanga kedek ngakak. “ hahaha, engken kabar e tu?” pitakon ni kadek. “tiang nu monean gen dek, tileh care pidan” pesaut I putu.

            Sampun nagih duang tiban Iputu sekelas ngajak Ni Kadek disubane jani suba nagih tamat. “dek, sing merase kal nagih tamat ee?”raos Iputu. “nggih tu, galah e jeg enggal sajan majalan” Pesaut Ni Kadek. Sebenehne Iputu nu ngelah rase teken Ni Kadek. Nanging Iputu tusing nyak ngorahang rasane teken Ni Kadek karna Iputu nawang Ni Kadek jani sampun ngelah tunangan.

Disubane jani suba kelulusan SMA, SMAN 2 Denpasar lulus 100% taun niki. “dek kija kal jani ngelanjutang kuliah?”pitakon Iputu. “tiang jagi ka sekolah perawatan tu, men tu kal kija?”raos NiKadek. “keneh tiang jagi kal ke pesiar dek, pang enggal liu ngelah pipis, hahaha” pesaut Iputu sambilanga kedek. Yadiastun jani suba limang tiban Iputu lan NiKadek tusing taen ketemu. Iputu sampun tamat kuliah lan sampun sukses ring kapal pesiar. Yan NiKadek sampun lulus kuliah perawatan lan sampun megae ring rumah sakit terkenal diBali.

            Kacritayang mangkin Iputu sampun diBali, ia mulih karna ningeh bapanne gelem lan ngamar ring rumah sakit Manuaba. Ia jagi nelokin bapanne ring rumah sakit. Disubane neked di rumah sakit. Mekesyab bayun iPutu karna ia nepukin NiKadek ring rumah sakit punika. “dek, nu inget teken titiang?” keto Iputu nyambatang Nikadek. “yehhh putu, nu lah tu, sing nyidang tiang ngengsapang Putu.”pesaut Nikadek. “hahaha, yan jodoh nak tusing lakar melaib dek.”raos Iputu. “engken kabar dek e ? sampun nganten jani ?”pitakon Iputu. “becik-becik gen tu, durung tu, tunangan gen sing ngelah, haha” pesaut Nikadek sambilanga kedek. “oo ketoo, dek nawang sing, sebenarne tiang nak nu ade rasa teken dek, nanging I pidan tiang tusing nyak ngorahang sawireh dek sampun ngelah tunangan.” Raosne Iputu. “tiang nawang tu, nanging tiang lek nakonang ento teken putu ipidan”pesautne Ni Kadek. “I pidan nak mbok tiange sane ngorahin tiang metunangan jak ia, tiang tusing prasida ngelawan munyin mbok tiange. Titiang sebenarne ade masih rasa jak putu.” Imbuhne Nikadek. “ohh saje keto dek? Mare tiang nawang” pesautne Iputu. “jani putu ngudyang mai ? nyen ane gelem?” pitakon ni Kadek. “ bapan tiange opname dini dek, sampun uling duang wai” pesaut iputu. “ohh keto, men dija kamarne ? tiang lakar milu nelokin”.

 “yeh putu, nyen ne tu ?” pitakon bapanne Iputu. “timpal tiang ajak masuk pidan pa.”pesautne. “ oo ne calon tu e ? mih jegegne, cocok be jak tu.” Raos memene Iputu. “sira wastane gek ?”pitakon bapane Iputu. “tiang Ni Kadek pa.” “nyak nganten jak panak tiange dek?”  pitakon memene Iputu. “Ape meme ne, jeg bise genn, hahaha” pesautne Iputu sambilanga kedek.

Kacritayang jani Iputu teken NiKadek buin metunangan care ipidan. Disubane bapane I putu sampun seger uling gelemne, Iputu langsung orahina ngantenin Ni kadek olih reramane. Iputu nganten ngajak Nikadek lan idup bagia.

“ keto suba yan iraga mule jodoh tusing lakar melaib, ne penting iraga seleg lan jemet apang prasida ngemolihang kesuksesan” suksma.

SELEG MALAJAH ULIAN ANAK LUH

Jam 2.15 siswa kelas SMA 1ne makasami sampun budal saking sekolah. Ring margi wenten I Wayan Weda lan I Wayan Supri majalan lan makedekan. “Sup, sube paek jani UN sube ke ade peningkatan belajar?” raos I Wayan Weda. “Beh, ngewalek Weda ne, sube tawang tiang males buka kene dije taen nyemak buku di jumah” saut I Wayan Supri nguyonin I Wayan Weda. “Hahahaha, tiang metakon de kadene malajah Sup, tiang sube patuh sing taen melajah, nepukin dogen sane madan integral tiang sampun kebus dingin” raos Weda sambilanga kedek. “Beh, kaden tiang je Weda melajah manten jumahne, tiang masih patuh nepukin sane madan Grammar jek nagih pegat angkiane” raos Supri nguyonin I Weda. Kedek ngakak lantas ipun sareng dadua ring margi.

Ring atenge perjalanane Weda lan Supri nepukin anak bajang jegeg ring arep ipune, inggih punika Luh Ayu. Supri cengar-cengir nepukin paras Luh Ayu saking duri. “Aduuh…. Jaen gati bodine Iluh Ayu”. Kedek lantas I Weda “ Khakakakak, Apane jaen Sup? Sampunang je makeneh sane joh-joh mare nepukin bodi seksi”. Masaut lantas I Supri “Sing ade pelihne bercita-cita ngelah somah care Luh Ayu da”. Kedek ngakak lantas I Weda.

“Duarrrrrrrr” saget I Luh Dini ngesiabang Weda lan Supri saking duri ipune sareng dadua, makesiab lantas I Supri lan Weda. “Aits…… Luh Dini jek ngae atman tiange nagih makecos, kaden tiang men sire” raos weda sambilanga makenyem. Kedek lantas Luh Dini“Hihihihi…… ampura da, boye je maksud tiang ngae atman Wedane makecos. Dados ngakak kedek sareng Supri da?”. “Ne, nak tuah maguyonan sareng Supri Luh” pisaut Weda bawak. “Beh, sube imang UN sampunang kedek-kedek manten Weda, punapi yening iraga ngae kelompok belajar sareng tiang, Weda, Supri, lan Luh Putu?” raos Luh Dini. “Tiang setuju manten Luh, ide becik sajan punika. Nanging timpal tiange Supri niki punapi ye?” pisaut Wedane. “Tiang setuju manten, nanging dije nike pacang kalaksanayang Luh ?” pitakon Wayan Supri. “Ring umah tiange punapi? Nanging sampunang kanti sandikala, iraga ngawitin saking jam 3-4 punapi?” raos Luh Dini. “Setuju…!!!” raos Weda lan Supri barengan.

Sesampune jam 2.55 Weda lan Supri majalan sinarengan jagi malajah bareng ring umahne Luh Dini. Sesampune neked irika sampun wenten Luh Putu sareng Luh Dini. “Sube makelo antos tiang, dados wawu teke Sup?” pitakon Luh Putu. “Nak tiang makelo ngantos Weda mapayas Luh” pisaut Supri sambilanga kedek. “De to gugune Luh, nak tunian wenten toris nakonang pertamina tiang ngatehin torise punika ke pertamina, niki tiang icene sepuluh ribuan” pisaut Weda sambilanga ngedengang pis ipune. “Dueg gati timpal tiange niki” raos Luh Dini. Makenyem lantas Wayan Weda polih pujian saking Luh Dini. “Ngiring jani kawitin malajahe, apang nenten makutang waktune” raos Luh Dini. “Inggih…!!!” pisaut Weda lan Supri.

Sesampune jam 4.00 Weda, Supri lan Luh Putu mapamit saking umahne Luh Dini. Sujatine I Wayan Weda demen sareng Luh Dini lan Wayan Supri demen sareng Luh Putu. Nike ngranayang Weda lan Supri dados semangat melajah bareng Luh Dini lan Luh Putu.

Telung minggu sampun majalan Weda lan Supri sampun dados siswa sane becik sane seleg malajah. Mangkin Weda, Supri, Luh Dini lan Luh Ayu sampun dados siswa sane nyalanang kewajiban ipune antuk malajah, mangkin ipun sampun siap ngadepin UN.

MAGALUNG”

Sasukat inget, sing taen tawang tiang demen rasane magalung. Da teh nyidaang mabaju anyar, malegan - legan malali ajak rerama, ajak timpal - timpal, pang sing kena opak dogen suba melah. Ento makada yen galungan, tiang sing taen ngelah keneh luung. Setata ibuk,sebet,nagih ngeling,sakewala sing nyidayang mesuang yeh mata.
Tiang sing nawang kenken kaden undukne. Ane setata ingetang tiang kayang jani, sabilang galungan, sabilang rerahinan, memen tiange setata mamedih, ngambres-ngambres. Pelih abedik, tiang katigtig.
Bapan tiange masih keto, munyine setata bangras, gelar-gelur sambilanga mecik sampian, maceki. Apa ja tagiha, apang becat kasediaang, apang prajani. Yen sing keto ngancan keras bapa mageluran, dijelekne misi misuh-misuh. Sabilang rerahinan, apa buin Galungan, meme bapan tiange setata marebat, dikenkene kanti masiat. 

Inget tiang dugase ento. Dugas Galungan taun 2001 ane liwat. Tiang suba masekolah kelas II SMP. Olih Guru Agamane tiang kaorahin, Galungan kone sarana ngerayaang kamenangan Dharma ngelawan Adharma. Pak Guru masih ngorahin, ane paling penting tuah ngalahang Adharma ane ada di deweke padidi. Ento ane setata ingetang tiang, ane ngranayang tiang sing bes sebet yen Galungan sing ngelah baju anyar, sing ngelah dadaaran jaen. Sakewala ane nyebetin tiang, solah bapan tiange ane cara nak ngadug-ngadug. Setata ngae biuta. Dademenane tuah maceki. Yen suba maceki, mapunduh ajak timpal-timpalne, negak awaian ngidaang, meh-mehan kanti engsap manjus. Cara dugas Galungane ento.
“ Gaenang kopi telu, teh dua,” keto i bapa mageluran. Japi ja bapan tiange sing nyambat adan, magresoan suba tiang ngae kopi teken teh. Apang suud gen ia mageluran. Sedek tiang ngae kopi teken teh, jeg makesiab tiang. Kuping tiange kedenga teken i meme.
“ Pragatang malu pasuciane, da nyemak gae lenan. Uli pidan iluh suba orahin meme, da ayahina bapan iluhe, pang sing kadung tuman. Yen Galungan rerahinan gede, gegaene bek, kaling ke nulungin somah, pragat iteh maceki, maayah-ayahan,” memen tiange pedih.
Buung tiang nuruhang yeh maluab, depin tiang lakar kopi ajak tehe. Buin tiang nanding pasucian. Inget tiang teken palajahan Agamane di sekolah. Pasucian ento kone katurang ring Ida Bhatara mangda kaangge masuci, rikala ngae pasucian pantesne madasar baan keneh ening lan suci. Inget tiang teken tutur Guru Agamane, degdegang tiang bayun tiange.Tambakin tiang yeh matan tiange ane nagih ngetel. Adeng-adeng kenehe, uncarang tiang gayatri mantrane, mara nyak angkihan tiange ngendukang, madegdegan.
Buin tiang iteh matanding, sabilang nagih sebet keneh tiange, buin tiang nguncarang gayatri mantra. Pragat kanti tetandingan banten tiange. Buin dingeh tiang, I bapa mageluran, jani adan tiange ane kakaukin turin misi misuh-misuh.
“ Luh Karti naskeleng cai ih, panak bebedag, dadai atiban ngae kopi, ngae lek gen, matiang cang nas caine,” bapan tiange mamedih. “ weh, aluh gen nagih kopi, kopin nyen to….., taen meli adaa”, memen tiange masaut, milu pedih. Buin dingeh tiang bapan tiange pedih, buin memen tiange, buin bapan tiange. Tiang jejeh sajan, ngetor, sing bani paek. Becatang tiang nyemak canang lan bantene, tiang malaib kasanggah, sambilang ngetelang yeh mata, tiang mabanten, nunas ica ring Hyang Widhi.
Ada ajam tiang mabanten disanggah, adeng-adeng tiang mulih. Tiang makesiab, pakakas dipaon mabrarakan, piring lan gelase belah makacakan. Tepuk tiang ada ketelan getih.
“meme,meme”, tiang paling ngalih memen tiange.
“meme………, meme……..,” tiang mageluran.
“plang…………..,” das sajan sirah tiange tepen dampar ane katimpug teken I bapa. Tiang bengong, engsek, bapan tiange makaukan, matane barak, tiang ngancan jejeh. Aget sajan liu teka nyama brayane ane nambakin bapan tiange. Yen sing ada nak tau, sinah tiang suba matatu, mehmehan suba mati. Tiang inget dugase ento tiang kakedeng teken uwan tiange ane nongos dikota. Mula gantine ia mulih tur nepukin uyut buka keto. Sasukat ento tiang ajaka nengil dikota, nongos diumahne. Tiang kasekolahan kanti tamat SMA.
Jani tiang suba magae dadi kasir di swalayan. Suba limang tiban tiang sing taen mulih, sing taen nepukin meme lan bapa. Uwan tiange ngorahang I bapa jani gelem-geleman. Sasukat I bapa gelem-geleman, I meme buin mulih apang ada ngayahin I bapa. Bengong tiang teken kapitresnanne I meme kapining bapa. Kangen sajan tiang teken I meme, edot masi tiang nepukin I bapa, sakewala marasa gedeg enu basang tiange teken solahne. Ento ngranayang tiang marasa sing dadi magalung. Suba ping dasa Galungan tiang sing mulih. Makelo sajan tiang muruk ngilangang gedeg basing tiange teken I bapa. Jani asane tiang nyidaang, encotang tiang kenehe mulih.
Tuun uli bise, batis tiange ngetor. Edot matemu meme lan bapa, sakewala marasa jejeh. Jang tiang malu aban-abane di trotoare, baliin tiang, ada woh-wohan, jaja, ada baju kebaya bang I meme, ada kamben sarung bang I bapa, ada masi be urutan dedemenan I bapa.
Sasubane di aep korine buin tiang nengil, marasa sing bani macelep. “ meme, bapa, tiang Luh Karti teka mulih”, edot sajan tiang majeritan keto, sakewala layah tiange caket. Yeh matan tiange makebios, makelo tiang nengil, bengong cara tanparasa. Kanti sing rungu tiang ken ada anak teka. I meme, memen tiange suba ada di malun tiange, tur ngelut tiang, tekek cara takut kalihin.
“ I luh,I luh, beneh iluh ne? Bli….., bli……, I luh mulih, iluh suba mulih,” keto I meme mageluran. Bapan tiange teka nyagjagin tur matimpuh di batis tiange. “ Bapa……,” tiang makesiab, goban bapan tiange suba ngenah tua sajan. Bangunang tiang I bapa, ajak tiang meme jak bapa macelep tur tegakang tiang dibalene.
“Luh, I bapa ngaden iluh sing kar nyak mulih buin. I bapa setata ngorahang I luh tusing nyak ngelah rerama jelek buka kene. Meme sing percaya luh, meme pastika luh kal mulih. Sabilang Galungan meme nunas ica, pang luh nyak mulih,” I meme ngeling. Tiang nawang elingne I meme, eling demen, eling bagia.
Matan tiange masi mayeh, tiang bagia, sawireh di Galungane ene tiang marasa magalung. Suba bisa ngalahang rasa gedeg baan rasa tresna.